AN LEABHARLANN

Bidh fàilte chridheil romhad aig Leabharlann Shabhal Mòr Ostaig. Gheibh thu an tuilleadh fiosrachaidh mu ghoireasan na Leabharlainn is ciamar a bhios tu gan cleachdadh air duilleagan na làraich seo.

‘S e rùn Leabharlann Shabhal Mòr Ostaig gum bi sinn a’ leasachadh cruinneachadh de ghoireasan air cànan, cultar is dualchas na Gàidhlig a bhios cho slàn agus cho coileanta ‘s a ghabhas agus a bhrosnaicheas ionnsachadh, rannsachadh is sgoilearachd; gun cùm sinn taic ris a’ Cholaiste is i na sàr ionad-foghlaim na Gàidhlig; gum bi sinn a’ brosnachadh fèin-mhisneachd air a’ Ghàidhealtachd a thaobh a cuid litreachais is cultair fhèin.

Tha Leabharlann Shabhal Mòr Ostaig na leabharlann oilthighe ach tha fàilte ro mhuinntir na sgìre is ro luchd-tadhail eile on taobh a-muigh a thighinn a chèilidh oirnn agus a chleachdadh nan goireasan againn.

Sireadh Adhartach

An Leabharlann ri linn Covid-19

Tha an Leabharlann fosgailte do dh’oileanaich is luchd-obrach is luchd-tadhail a-rithist. Tha goireasan didseatach againn cho math ri seirbheisean cliog is cruinnich, puist is sganaidh (fiosrachadh gu h-ìosal), a leigeas leat na cruinneachaidhean a chleachdadh taobh a-muigh na Leabharlainn cuideachd. Airson taic bho sgioba na Leabharlainn, nach cuir thu fios thugainn air post-d.

Uairean-fosglaidh ▿

Seirbheis Cliog is Cruinnich ▿

Seirbheis iasaid tron phost ▿

Thoir sùil air catalog na Leabharlainn agus cuir post-d thugainn ag innse dè an leabhar/na leabhraichean a tha a dhìth ort. Thèid an t-òrdugh a chur thugad tron phost.

Gabhaidh leabhraichean tilleadh dhan Leabharlann an-asgaidh, a’ cleachdadh an t-seòlaidh gu h-ìosal. Cleachd a’ bhileag seòlaidh a fhuair thu an cois a’ pharsail leabhraichean agad no sgrìobh an seòladh mar a tha e a’ nochdadh gu h-ìosal. Chan eil feum air stampa no fiosrachadh sam bith eile air a’ chèis no parsal. Cha ghabh am Post Rìoghail ach ri parsalan air a bheil an seòladh seo:

Freepost RUEA-AXHB-YJEB
An Leabharlann
Sabhal Mòr Ostaig
Ionad Nàiseanta Cànain is Cultair
Teangue
Isle of Skye
IV44 8RQ

Seirbheis sganaidh ▿

Stiùireadh air Goireasan Didseatach ▿

Tha stiùireadh air goireasan leabharlainn OGE ri fhaighinn an seo.

Leabhraichean agus irisean didseatach
Bidh sinn a’ moladh dhreachan dealanach de leabhraichean do Leabharlann OGE far a bheil sin comasach. Chì thu na tha ri fhaighinn ann an cruth didseatach air modalan fa leth air na liostaichean mhodalan an seo.

Cleachd LibrarySearch airson goireasan air-loidhne a lorg. Cleachd na roghainnean ‘teacsa slàn’ no ‘air-loidhne’ airson nithean a shireadh a ghabhas leughadh ann an cruth didseatach. Bheir seo stuth clò-bhuailte far nan toraidhean agad. Tha tòrr mòr ghoireasan air an stòr-dàta A-Z aig OGE.

Tha barrachd stiùiridh air goireasan dealanach, leabhraichean-d, ainmeachadh thùsan agus gu leòr eile air duilleag-dhachaigh LibGuides aig OGE.