Hitman 3
| Hitman 3 | |
|---|---|
 | |
| Изработувач | IO Interactive[б 1] |
| Издавач | IO Interactive[б 1] |
| Режисер | Матијас Енгстром |
| Продуцент |
|
| Програмер |
|
| Уметник | Александар Андерсен |
| Сценарист |
|
| Композитор | Нилс Бај Нилсен |
| Серијал | Hitman |
| Погон | Glacier Engine 2 |
| Подлоги | |
| Датум(и) | 20 јануари 2021
|
| Жанр | потајна игра |
| Режим | едноиграчки, повеќеиграчки |
| Носител(и) | Blue-ray, дигитална распределба и облачни игри |
| Побарувања |
|
| Управување | гејмпад, тастатура, глувче и Meta Quest 3 |
Hitman 3 (македонски: Платен убиец 3) — компјутерска игра во жанрот потајна акција, развиена и издадена од IO Interactive. Ова е осмата игра во серијалот Hitman, а воедно и третиот и последен дел од трилогијата World of Assassination, по игрите Hitman (2016) и Hitman 2 (2018). Играта била објавена на 20 јануари 2021 г. за подлогите Windows, PlayStation 4, PlayStation 5, Xbox One и Xbox Series X/S. Специјална верзија на играта, која користи облачни технологии, била објавена и за услугите Stadia и Nintendo Switch.
Како и претходничките, Hitman 3 има 6 нивоа, од кои 5 се големи отворени места. Агент 47 може слободно да се движи по секоја карта за да открие можности за убиства. Играчот може да извршува задачи во секоја мисија за да отклучи нови предмети.
Играта добила признание од критичарите; некои критичари ја нарекле најдобра игра во серијалот Hitman и една од најголемите потајни игри на сите времиња. Hitman 3 била особено фалена за обработката на сите нивоа и атмосферата, механиката на криење и способностите на Агентот 47. Hitman 3 станала најтрговски успешната игра во франшизата. Покрај ова, играта добила разни награди, вклучително и „PC-игра на годината“ на Golden Joystick Awards 2021.
Играчки процес
[уреди | уреди извор]Како и претходните игри од серијалот, Hitman 3 е потајна игра од трето лице со главен лик — клонираниот платен убиец, познат како Агент 47. Во играта, 47 патува низ различни места и извршува нарачани убиства, продолжувајќи ја приказната од последните две игри. Во базичната игра се појавиле шест нови места: Дубаи, Дартмур, Берлин, Чонгчјинг, Мендоса и Карпатите (Романија). Сопствениците на Hitman или Hitman 2 можат да ги увезат картите, нивоата и својот напредок во Hitman 3.[1]
Новите места во Hitman 3 вклучуваат „трајни кратенки“ — нова особеност на играта во серијалот. Секоја етапа вклучува неколку првично заклучени врати, кои можат да се отворат само од едната страна; откако ќе се отклучат, овие врати остануваат отворени во сите идни прооди, што овозможува побрзо стигнување до првично затворени места. Во Hitman 3 е додаден нов елемент — камера, достапна по подразбирање, која може да се користи за фотографирање, како и за цели во играта, како што е отворање врати на одредени карти. Уште една нова функција во играта се „дигиталните тастатури“, каде играчите треба да најдат четирицифрени кодови, а потоа рачно да ги внесат за да отворат врати и сефови.
Играта има усогласеност со верзијата за PlayStation 4 и со PlayStation 5 преку обратна усогласеност. Поддршката за VR на компјутер била додадена подоцна, на 20 јануари 2022 г. За разлика од Hitman 2, тука нема повеќеиграчки режими, режимот „Снајперски платен убиец“ е чисто за еден играч, а „Призрачниот режим“ (англ. Ghost mode) е целосно отстранет.
Hitman 3 има режим на договори, во кој играчот може да избере до пет цели на сите карти, да додаде свои правила и усложнувања, како што се конкретни методи на убиство, и да ги сподели своите договори со други играчи. Редовно се додаваат „избрани договори“, кои можат да бидат избор на договори од заедницата на одредена тема (на пример, за време на „Сезоните на гревот“) или договори склучени од конкретни изданија за игри или YouTube-канали. Во играта има и споредни мисии, создадени од програмерите, познати во играта како „ескалации“, кои претставуваат повеќестепени договори што постепено се усложнуваат со секое ниво што играчот го поминува.
Приказна
[уреди | уреди извор]За време на настаните во Hitman 2, професионалниот убиец Агент 47 и неговата координаторка Дијана Бернвуд дезертирале од Меѓународната агенција за договори (МКА) и ги здружиле силите со измамникот платеник, како и пријател од детството и брат на 47 — клонот Лукас Греј (Субјект 6), за да ја уништат „Провиденс“ — алијанса на раководители на корпорации и индустријалци, кои колективно поседуваат политичко, воено и економско влијание. Додека 47 и 6 се стремат да му се одмаздат на „Провиденс“ за тоа што ги претвориле и двајцата во убијци, Дијана е мотивирана од смртта на своите родители, откако дознала од контролорот на „Провиденс“, Артур Едвардс, дека 47 и 6 ги убиле нејзините родители. Триото го одвлечкува контролорот, познат како „Константа“, кој ги именувал тројцата партнери што ја контролираат „Провиденс“: Карл Инграм, Маркус Стајвесант и Алекса Карлајл. Како и да е, подоцна Едвардс бега од заробеништво и владее со корпоративните средства на партнерите.
Работејќи заедно, браќата ги елиминираат Карл Инграм и Маркус Стајвесант во Дубаи за време на отворањето на „Скипетра“, највисокиот облакодер во светот, а Алекса Карлајл — во нејзиниот семеен имот во Дартмур (Велика Британија). По смртта на партнерите, Едвардс го презема управувањето со „Провиденс“ и испраќа платеници што ги заробуваат 6 и Бернвуд. 6 извршува самоубиство за 47 да не биде фатен.
Агент 47 договара средба во Берлин со хакерката Оливија Хол, единствената доверлива сојузничка на 6. Откривајќи дека МКА ги следи, 47 убива неколку агенти на МКА испратени за негова елиминација, пред тој и Хол да одлучат конечно да ја запрат МКА, разоткривајќи ги злосторствата на агенцијата пред јавноста. 47 ги елиминира Хаш и Имоџен Ројс, надзорници на складиштето за податоци на МКА во Чонгчјинг, Кина, дозволувајќи ѝ на Хол да ги украде и објави сите оперативни податоци на МКА. 47 исто така претпазливо ги брише сите податоци за себе и за Дијана Бернвуд за да не ги бараат. МКА овој пат е неповратно компромитирана и распуштена.
Во меѓувреме, Едвардс се обидува да ја претвори Бернвуд во своја наследничка на функцијата „Константа“ и постигнува таа да го предаде 47, конечно откривајќи во детали како тој ги убил нејзините родители. Дијана навидум игра двојна игра со двете страни, прифаќајќи ја понудата на Едвардс и поканувајќи го 47 на состанок на членовите на „Провиденс“ во Мендоса, Аргентина, каде Дијана го моли 47 да ги елиминира оние што се против неа како наследничка на Едвардс — Тамара Видал и дон Арчибалд Јејтс — за таа да може да ја ликвидира организацијата откако ќе добие контрола над неа. Додека тој ги следи нејзините упатства, долгогодишната доверба на 47 во Дијана е конечно поткопана кога таа го предава и го труе со отров во одмазда за убиството на нејзините родители. 47 искрено ѝ се извинува на Дијана за тоа што некогаш ги убил нејзините родители, но таа вели дека не го обвинува, бидејќи тој немал избор, а таа има.
Во сон, 6 го убедува 47 дека Дијана не го предала, туку попрво помогнала да се постави Едвардс во неговиот дофат. 47 се освестува во заробеништво во воз што се движи низ Карпатите од Загреб кон Иркутск заедно со Едвардс. Иако Едвардс има намера да го направи 47 убиец за „Провиденс“ уште еднаш, бришејќи му го помнењето со инјекција серум, 47 се ослободува, и тука стануваат достапни 3 завршетоци: 1) едноставно да го убие Едвардс, 2) да му вбризга серум и нему да му го избрише помнењето, 3) да си вбризга серум самиот на себе. Ако 47 не си вбризга серум, тој го запира возот со стоп-кочница и бега. Ако сепак вбризгува, ќе се разбуди во бела соба со меки ѕидови и со избришани спомени. Во меѓувреме, Дијана ја презема власта како „Константа“ и спроведува чистка во редовите на „Провиденс“ од раководните должности на големите глобални корпорации, демонтирајќи ја структурата на моќта на „Провиденс“. Ако 47 не си вбризга серум и се пресметува со Едвардс, една година подоцна тој повторно се среќава со Дијана, и тие, отсега работејќи само за себе, се враќаат на своите претходни улоги на платен убиец и координаторка, за да ја држат светската елита под контрола.
Белешки
[уреди | уреди извор]Наводи
[уреди | уреди извор]- ↑ Chalk, Andy (11 јуни 2020). „Hitman 3 is coming in January“. PC Gamer (англиски). Архивирано од изворникот 11 јуни 2020. Посетено на 11 јуни 2020.
