Megan Moroney

	Megan Moroney
	sjonger en/of muzikant
	persoanlike bysûnderheden
echte namme	Megan Ann Moroney
nasjonaliteit	Amerikaansk
berne	9 oktober 1997
berteplak	Savannah (Georgia)
etnisiteit	Angelsaksysk Amerikaansk
	wurkpaad
sjenre	country
sjongtaal	Ingelsk
ynstrumint	stim, gitaar, piano
grutste hit(s)	Tennessee Orange
jierren aktyf	2020 – no
	offisjele webside
	www.meganmoroney.com

Megan Moroney (folút: Megan Ann Moroney; Savannah, 9 oktober 1997) is in Amerikaansk sjongster fan countrymuzyk. Hja hie yn 2022 en 2023 har earste grutte hit mei de single Tennessee Orange.

Libben en karriêre

Jonkheid en oplieding

Moroney waard yn 1997 berne yn Savannah, yn 'e Amerikaanske steat Georgia. As bern harke se al in protte nei countrymuzyk en teffens learde se doe pianospyljen. Nei't se de middelbere skoalle ôfrûne hie, studearre Moroney digitale marketing en muzykbedriuwskunde oan 'e Universiteit fan Georgia yn Athens, in foarstêd fan Atlanta. Yn dy snuorje wie se al begûn mei it fersoargjen fan optredens as countrysjongster en foarme se it foarprogramma by in konsert foar Chase Rice en by in konsert fan Kristian Bush fan it duo Sugarland.

Karriêre

Nei't se klear wie mei har stúdzje ferfear Moroney yn 2020 nei Nashville yn Tennessee, it mekka fan 'e countrymuzyk, om in karriêre as sjongster nei te stribjen. Se wie yn kontakt bleaun mei Kristian Bush, dy't har dêre by oare liettsjeskriuwers yntrodusearre. Yn 2021 brocht Moroney har earste single út, mei as titel Wonder. Dy berikte de hitlisten net, mar late wol ta it opnimmen fan 'e EP Pistol Made of Roses, dy't yn july 2022 útkaam.

Yn oktober 2022 folge Moroney har twadde single, Tennessee Orange, dy't troch Bush produsearre waard. It liet waard troch online-streaming populêr en behalven yn 'e country-hitlisten krong it ek troch yn 'e pophitlist Billboard Hot 100. It groeide út ta in grutte hit, dy't sertifisearre waard as fjouwer kear platina (en yn Kanada as twa kear platina en yn Nij-Seelân as goud). It berikte it tolfde plak yn 'e Hot Country Songs, it tsiende plak yn 'e Country Airplay en it 53e plak yn Billboard Hot 100.

Troch it súkses fan Tennessee Orange krige Moroney in platekontrakt oanbean troch Arista Nashville, dat se oannaam. Wylst it liet opklom yn 'e hitlisten, waard dat platelabel lykwols opdoekt, sadat Moroney bedarre by Columbia Records, in oar label fan deselde memme-ûndernimming, Sony Music Nashville. Sadwaande kaam yn maaie 2023 by Columbia har earste album út, dat de namme Lucky droech en dat û.o. de singles Tennessee Orange en Lucky omfette. It berikte de top 40 fan 'e Billboard 200. It gesachhawwende tydskrift Rolling Stone rôp Lucky út ta it bêste countryalbum fan 2023.

Ek yn 2023 wurke Moroney gear mei de band Old Dominion oant 'e single Can't Break Up Now, dy't nominearre waard foar ferskate wichtige prizen. Har eigen promoasjesingle No Caller ID waard in platina plaat. Yn 2024 brocht Moroney har twadde studio-album út, mei as titel Am I Okay? De titelsong dêrfan wûn yn 2025 de MTV Video Music Award foar bêste countryfideoclip. Yn maart fan dat jier sette Moroney yn Montreal útein mei in toernee dêr't se hiel Noard-Amearika mei trochreizge, om úteinlik yn oktober te einigjen yn Tampa (Floarida).

Priveelibben

Sûnt 2020 wennet Moroney yn Nashville (Tennessee).

Yn 'e fideoclip fan Tennessee Orange droech Moroney in Tennessee Volunteers-shirt fan sjonger Morgan Wallen, mar se hold har yn 't earstoan op 'e flakte oer de fraach oft dat betsjutte dat se in relaasje mei him hie. Yn 2024 befêstige se dat dat sa west hie, hoewol't it neffens har nea sa serieus "oan" west hie as yn 'e fideoclip. Moroney en Wallen wiene anno 2024 noch goed befreone.

Diskografy

Albums

Studio-albums

útbrocht	titel	label	prizen en nominaasjes	resultaat
5 maaie 2023	Lucky	Sony Music Nashville		(goud)
12 july 2024	Am I Okay?	Sony Music Nashville & Columbia Records	nom. foar American Music Award foar favorite countryalbum	(goud)

EP's

útbrocht	titel	label	prizen en nominaasjes	resultaat
15 july 2022	Pistol Made of Roses	Sony Music Nashville
1 nov. 2024	Blue Christmas... Duh	Sony Music Nashville

Singles

jier	titel	prizen en nominaasjes	resultaat	album
2021	Wonder			gjin album
2022	Tennessee Orange	CMT Music Award foar froulike trochbraakfideoclip fan it jier nom. foar ACM Award foar liet fan it jier nom. foar ACM Award foar fisuele media fan it jier nom. foar CMA Award foar liet fan it jier nom. foar CMT Music Award foar digitaal optreden fan it jier	(4× platina) (2× platina) (goud)	Lucky
	Hair Salon			Pistol Made of Roses
	Fix You, Too
	I Love Me
2023	I'm Not Pretty	nom. foar CMA Award foar fideoclip fan it jier nom. foar CMT Music Award foar froulike fideoclip fan it jier nom. foar CMT Music Award foar digitaal optreden fan it jier	(2× platina) (goud)	Lucky
	Lucky			Lucky
	What Are You Listening To?			gjin album
2024	Am I Okay?	MTV Video Music Award foar bêste countryfideoclip	(2× platina)	Am I Okay?
	No Caller ID	nom. foar People's Choice Country Award foar froulik liet fan 2024	(platina)
	28th of June
	Indifferent		(goud)
	Man on the Moon
2025	You Had to Be There (mei Kenny Chesny)			3e studio-album (noch net ferskynd)
	6 Months Later		(goud)
	Beautiful Things

Gastsingles

jier	titel	prizen en nominaasjes	resultaat	album
2023	Can't Break Up Now (mei Old Dominion)	nom. foar ACM Award foar muzykbarren fan it jier nom. foar CMT Music Award foar kollaborative fideoclip fan it jier nom. foar People's Choice Country Award foar kollaboratyf liet fan 2024		Memory Lane
2024	Never Left Me			Twisters: The Album (soundtrack fan 'e film Twisters)

Keppelings om utens

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.