Arte gotico

Iste articlo tracta sobre un estilo artistico dito gotico; ta atros emplegos se veiga gotico.

A seu Santa María de Palma de Mallorca, en Palma de Mallorca (islas Balears), a segunda seu de mayor altaria d'o mundo.

Con o nombre d'arte gotico se fa referencia a un estilo artistico present en a cultura europea dende la segunda metat d'o sieglo XII u principios d'o sieglo XIII dica lo sieglo XV u lo sieglo XVI (en coincidindo la suya desaparición con o Renaiximiento), substituyindo a l'arte romanico y estando posteriorment substituyiu por l'arte renaixentista.

Naixiu orichinalment en a rechión de París en relación con a construcción de nuevas seus con una nueva concepción arquitectonica, l'estilo se difundió enta los territorios d'o Sacro Imperio Romano Chermanico, islas Britanicas, Italia, Corona d'Aragón, Navarra, reino de Castiella y Portugal, encara que con caracteristicas y peculiaridaz diferents seguntes as diferents rechions. Como caracteristica cheneral, mientres que lo romanico buscaba que la persona se sentise en recullimiento en a presencia de Dios en a ilesia, lo gotico preteneba transmitir a l'espectador a riqueza divina a traviés d'a elegencia y lo luxo en fenzo servir linias estilizadas en cuentas d'a pesadeza que transmitiba lo romanico.

Naixiu en l'ambito de l'arquitectura, l'arte gotico tenió tamién manifestacions en a pintura u l'escultura.

Orichen d'o termin

A expresión "arte gotico" prencipió a fer-se servir a partir d'o sieglo XV ta amostrar desiria frent a l'estilo arquitectonico emplegau dica l'inte en Europa y considerau como "antigo" en cuentas d'a expresión "Renaiximiento" ta designar a l'estilo nuevo, l'estilo de l'arte renaixentista. En ixe contexto, ta amostrar clarament a concepción que se teneba d'ixe arte "antigo" y considerau propio de barbaros se prencipió a usar "arte gotico", asociando-lo a los godos a qui en ixas envueltas se veyeba como destructors de l'Imperio Romano y d'a suya arquitectura y sociedat y creyadors d'un periodo fosco y negro en a Historia d'Europa a lo cual o nuevo estilo arquitectonico quereba amanar-se en ixe "Renaiximiento".

Se veiga tamién

• Arquitectura gotica.
• Arte gotico en Aragón.
• Escultura gotica.
• Pintura gotica.

Vinclos externos

• Se veigan as imáchens de Commons sobre l'arte gotico.
• Museo virtual d'arquitectura gotica mediterránea.

• Datos: Q46825
• Multimedia: Gothic art / Q46825