Barack Obama

Barack Obama (巴拉克‧歐巴馬)

Hai, maedeng ita. (Yes we can.) 2008/11/5

I 2008 miheca 11 folad 5 romi’ad, no niyah Amilika, saki fa^elohay tilid no likisi i hekal. Saka 56 rekad congtong no Amilika a singkiw, nai 232 mihecaan na mapatireng ko kitakit no Amilika masofoc ko cecay fohetingay tamdaw congtong ci Barack Obama. Tona milicay ko sinpon palosiyangay no tilifi to cecay a finawlan i, paca’of cingra to o Africa a dotoc Amilika tamdaw o kalita’angan, nikawrira o sakafalicaw no aniniay Amilika tamdaw, o nian ko sakalita’angaen ako saan. Mahapinang to oni Amilika a finacadan a kasaparod, ma’awasay to ko kasa’epec no finacadan, tayra to i fa^elohay a tato’asan.

Anini 47 ko mihecaan ni Barack Obama, o nano Kenya kitakit tayni i Amilika mitilid, o mikingkiway to no tamdawan ko ina, itira i Hawaii ko sofoc ni Obama, o Africa dotoc Amilika tamdaw, anini, o saka sepat a masakapahay no Amilika congtong cingra. Tona misi’ayaw cingra to ’alomanay finawlan a ma’acang, ci Obama i 11 folad 5 romi’ad a dadaya mihapiw cingra a papelo: Yes, We can. (Hai, maedeng ita.) sanay a pisalemed no Amilika.

Halo, Chicago! (哈囉，芝加哥)

Tada: kakahemekan ako masa’icel a pakaki’aotay a fafa’eday lomaocay i New Hampshire ci Bill Clinton.

I ’ayaw no pinapina a lipay, awaay ko pakahiratengay a tamdaw to mamalaheci ko nademak anini a dadaya lalahecien a demak. Itini to nia karomakatan a milafo, tararikoray ho kita, matiya o romakatay i tonotono’an a sacokacok.

Nikawrira mapahapinangay matilid i nisa’osian i, o kasadak iso a mihapiw to sasowalen o “sakafalicaw” no demak. Itini to nia tatokian, pakaynien i ngiha iso ato sapifalicaw no pitopa iso a paya. Itini to nia pitopaan, o a ira ko cecay a demak i Amilika masapinang.

Ira ko cecay a demak to mamasapinang, tona o fainayan ato fafahiyan cangra itira i kaso’edaan a folad, I Dimont ato i Davenport, i Lebanon ato Concord a masatisil marayaray ko mipacelcelay, nawhani paso’elin cangra, o mamafalic ko nakitakit saan.

O a ira ko cecay a demak a mamasapinang, o kapah tamdaw ato cifaloco’ay a kapah tamdaw, nao caayay ho pikihatiya to sici, na o caayay ho pakanengneng to paya sapisingkiw, nawhani i faloco’ nangra,  mafana’ cangra anini o mamafalic koni.

O a ira ko cecay a demak a mamasapinang, tona o ’alomanay tamdaw caay ko dengan no niyah a sician a kasarekad ko nicokeran, o sakalacecayaw no pafaloc’an, ano cidafongay to ato pakoyocay to tamdaw; o kohetingay tamdaw ato fohecalay tamdaw, o Latin ato Asia a tamdaw; ano nai Iowa sa’etal a mimokal ato New Hampshire sa’etal ato Nevada sa’etal ato South California sa’etal to, sahetoay o mipatalaay kita to mamikerid to fa^elohay pasayraay no kitakit a rarakat. Oraan koya mamasapinang a demak i Amilika. O “kafalic” sanay a demak masapinangay a demak i Amilika.

Manga’ay iso a mikihatiya to roma a fa^elohay a sici a kasarekad, malomikeriday to halafinay to’emanay a sici nina kitakit, o fa^elohay ’alomanay kasarekad o pakoniraay sarekad (Mincutang), o caay pikapot to sarekad a tamdaw ato nipapolongan sarekad (Kunghetang), ano cimaay to ko mafana’ay manga’ayay paini to masasiromaay a mala o miliyangay a tamdaw; o kafana’an to no fa^elohay a sakapot, ano mapalosingang ita ko sasowalen, o tatamorongen ita ko ’icel no micalapay to karomakatan a lalan, mapalowad ita ko sakanga'ay tahira toya hekal. awaay ko caayay ka salof a demak ita, awaay ko caayay ka felih a ’oripen.

O fa^elohay a sarekad no Amilika manga’ay misalof to caayay ka kararimaan, caayay ka o nga’ayay pidemak to sakadamaay notireng a telek. Manga’ay ita mikerid ko ising ato adadaay; mitahidangan ato mitahidangay; o pakoniraay sarekad ato nipapolongan sarekad a malacecay, maedeng pasifana’en ita ko mali’acaay to sapaiyo ato mipahokingay, tona maro’ cangra a masasowal i, aka to kalalikel mi’aca to ’anengan. Caay kai matini. Caay kai aniniay.

O fa^elohay alomaay sici a sarekad kita a maedeng mipaterep toya mikoliniway a malinah patayra i roma a kitakit a pakatayalay kosi to matayalay o sakaserer no sata, pala o malosakanga’ay a maserer ko sata no malalokay a matayal, nawhani o sakanga’ay i cangraan koni.

Maedeng paterepen ita ko kangodoen no kaemangay ita i pangpangan no pitilidan, patayraen cangra i nga’ayay sakacakat rakaten a lalan. Manga’ay ita paterep to palata’angay to singsi, o pipatodong to pipacakat to lifon ko nga’ay malosapakaolah to satadamaan nangra. Kita o fa^elohay alomaay sici a sarekad ko mamilaheci toni a demak.

Maedeng pakaynien ita i maomahay ato kakako tamdaw a taneng; o ’icel no finawlan ato malatawkiay kosi, na itini kitakit pakayni i mitodisay to simal masadak a mipa’orip, mapa’orip ko dohaw no mita, nawhani caay ko mamiliyaw ma’orip caira.

Ano maala kako a malacungtong, paterepen ita ko kalalood i Iraq, keriden ita ko sofotay a panokayen. Pahereken ita ko kalaliyang a lalood to Qaeda in Afghanistan sakapot. O dadipoten ita ko misawadayto a sohitay; palowaden ita ko tadancaay a pinangan ko nengneng no kasakitalit titaanan.

O roma sato, o ecacaay to ka o 911 demakan ko sapiala to singkiw sakaira no nipitopa, nawhani caayko sakaala a halaka ko raan, o sapipalowadaw to polong no Amilika ato polong hekal malacecay ko pilifet to  21 sici a katalawan no hekal: masakakoki’an, sakalatiih a sakari’ang, malatiihay kafalifalic no romi’ad, sakalapakoyoc, kapapatapatay no finacadan ato adada.

O polong no patosokan sakimilafoay konini. Ira ko nga’ayay pakayraan a milaheci. Saheto o cifaloco’ay to hakanga’ay no kitakit kita, so’elinay foloco’ ko sapipatadoaw to nia kitakit.

Nikawrira masasiromaay ko pakayraan to sapilafo ita, nawhani caay ko nika lacungtong to ako a o maan ko dademaken, halo ita mapolong ko dademakay, o miolahay ho tonini a kitakit a tamdaw i, o mamifalic to nian.

Nawiro o nomisoay koni a dadaya a han. O no kasawasilay, o no milonokay, o polong no paso’elinay to kafahekaan masaopoay kamo ko nianan.

Kafana’en ita, o raraya’ ho ko kalaloodan. nikawrira hiratengaw, ano masamaamaan ko kaira no misa’etay to rarakaten a lalan, awaayko pakatena’ay to sapatekay masa’ofaday a ngiha to sapifalicaw nanay.

Aka piti’er kita a milecad to radiw no milokesay, tata’ata’ang ko ngiha a radiw nangra o malosakacaay ka sasinga’ay. O sapihapinang a paso’elin, mapapipaterep kita tonini a demak, mapatalaw kita to sowal, o moraraway ko pafaloco’ to finawlan no kitakit ko nian saan.

Nikawrira caayko mahaenay konini a demak, caayko tao ko nian, o Amilika, o caay kamoraraw ko pafaloco’an itini. I ’ayaw, tona misi’ayaw kita to caayay kalaheci a demak i, tona matoro’ kita caay ho ka songila’ ko demak, ano eca tona mimaan a mitanam, caay pakalaheci ko demak saan toya i, o finawlan no Amilika ko cecay rahodayay sapasifana’ a saca’of: kalacecayaw ko hirateng ato salo’afang no finawlan.

Hai, maedeng ita.

Onini a sifana’ matiliday to i pipatirengan to kitakit a tilid, mahapiw to pakafana’ to cihaw no kitakit.

Hai, maedeng ita.

Kalosasowalen no mafadesay ato mapalasawaday to malafadesay a mayakyak ko nian, i to’emanay a dadaya, mapalalan no likat mapatedi ko sapakoniraan.

Hai, maedeng ita.

Kalosasowalenanay ko nian, itini i kasakapot a malinagay, o sakacipaya a misa’icel to no fafahiyan ko nian. O masafoladay ko pipili’ mamalacongtong no kitakit, ano eca o mamikerid titaanay a patayra i tokos, ta pasowal a mitoro’ to sakatayra i kitakit no kakarayan a lalan a hongti matiya.

Hai, maedeng ita.

Nai maraayay hekal marepetay a mafolaway kasasowalan, palaplap a tayra i noetipan a hekal ko mimatangay a miraradiway.

Hai, maedeng ita.

Manga’ay ita pasayra i mo^ecelay ato malalenay. Manga’ay kita pasayra i cito’ekay ato kacemahadana a tala’ayaw. Manga’ay ita miadah ko nia kitakit. Manga’ay ita misalof konini a hekal. “Yes, We Can.” Hai, maedeng ita.

Orasaka, ano dafak, tona tayra kita i katimol ato ka’etip a mirakat i, kafana’an ita itiraay i Spartanburg matayalay to tinooy karorayan ato itiraay i Las Vegas marorayay mifanaw to kaysing; tona mafana’ kita to cecay i Dillon a wawa to fafahiyan sacifaloco’ saan sakatayraan toya makadadacay to a pitilidan ato itiraay i lalalan no LA i lalanay minanam a wawa to fainayan malecaday I; aka to kao kasasiroma no sici a hareteng a masasiketed masapitao, o malacecayay kita, o cecayay a kitakit kita.

Ka lakayat kita, o toloay a tilid ko sakafa^eloh a kimad no Amilika, rayrayen ita konini, “Yes, We Can.” Hai, maedeng ita.

Malacongtong ci Barack Obama.

Mifalicay to tilid (文字翻譯)

Ci Masao Nikar - 'Amis/Pangcah.