Kristohanon

Iton pagigin Kristohanon o Kristianismo usa nga relihiyon nga nakabase ha kinabuhi ngan panutduan ni Hesus han Nazareno, nga ginhulagway han Bag-o nga Ginsabutan. An mga nanunuo nga gintatawag nga Kristiyano, natuo nga hi Jesu Cristo amo an Anak han Ginoo nga Diyos ngan mantatalwas han ngatanan nga katawhan, ngan an pagbalik komo Messias in gin-asoy han Daan nga Ginsabutan.

Depende ha ispesipiko nga denominasyon han pagigin Kristohanon, an mga buruhaton in puydi maglakip hin pagbunya, Yukaristiya, pangadi, kompisal, kompirmasyon, rito hin pag-aasawa ngan han pan-relihiyon nga panutdo ha batan-on. Kadam-an ha mga denominasyon in nag-oordina hin kapadian ngan nagbubuhat hin regular nga grupo-grupo nga serbisyo hin pag-singba.

Mga Gintotoohan

Samtang an mga Kristiyano ha bug-os nga kalibotan nagkakapariho hin nangunguna nga mga kombiksyon, may-ada mga pagkaiba-iba han mga interpretasyon ngan mga opinyon han Bibliya ngan han sagrado nga mga tradisyon nga ginbasaran han Kristohanon, pananglitan may kalabotan ha mga topiko ha eskatolohiya.

Kristiyano nga eskatolohiya

An katapusan han mga butang, katapusan man han kinabuhi han usa nga indibidwal, katapusan han panahon, o katapusan han kalibotan, ha haluag nga pagyakan, amo an Kristiano nga eskatolohiya; an pag-aram mahitungod han dadangatan han mga tawo sugad han iginpapahayag ito ha Bibliya. An mga dagko nga isyu ha Kristiyano nga eskatolohiya amo an Kasakitan, kamatayon ngan an kinabuhi katapos han kamatayon, (labi na para han Ebangheliko nga mga grupo) an Milenyo ngan an sumunod nga Pag-agaw, an Ikaduha nga Pag-abot ni Hesus, Pagkabanhaw han mga Patay, Langit, (para han mga sanga han liturhiya) Purgatoryo, Impyerno ngan an Katapusan nga Paghukom.