Kavinsky

Vincent Belorgey (ume shikipil chikume / 2007).

Kavinsky

Vincent Belorgey kaj tiktukeytiat "Kavinsky", nesik tik ne tunal se pual majtakti se pal ne metzti chikume tik ne shiwit se shikipil chiknawi tzunti yey pual kashtul (31/7/1975). Yaja Franciachanej sonchiwani, takwikalisneluani, takwikalischiwani wan kisa tik ne weyak ujulinkwikwil. Ne ison kenha ka ne son ipanpa ne weyak ujulinkwikwil intzalan ne shiwit se shikipil chiknawi tzunti nawi pual wan ne shiwit se shikipil chiknawi tzunti nawi pual chikwasen (1980–1989). Ne ison kielnamiki keman yaja piltzin katka wan kitak weyak ujulinkwikwil. Yaja kikwij se takutun ne son inpanpa ne weyak ujulinkwikwil pal ne ison. Ne tuijikniwan inaket ka ison kenha Danger wan Daft Punk.

Icasoj

Kavinsky pejki kichiwa inson tik ne shiwit ume shikipil makwil (2005) ika igustuj ne son inpanpa ne ichajchakuwan Jackson Fourgeaud wan Quentin Dupieux. Quentin weyakulinkwikwiltuktiani wan yaja kipiak ne ison Kavinsky tik ne weyak iulinkwikwil "Steak". Ne achtu kutu iyawaltakwikalis "Testarossa Autodrive" katka, ika yaja igustuj ne tawikani "Testarossa" ipanpa Ferrari wan uni itawikani. Yaja kilwitij Quentin ne kutu inyawaltakwikalis wan yaja kilwitij ne kalsonchiwalis Record Makers wan yajika Kavinsky nemik iwan Record Makers.

Nemanha Kavinsky kichiwki yey "EP" iwan ne kalsonchiwalis Record Makers: "Teddy Boy" tik ne shiwit ume shikipil chikwasen (2006), "1986" tik ne shiwit ume shikipil chikume (2007) wan "Nightcall" iwan Lovefoxxx tik ne shiwit ume shikipil majtakti (2010). Kavinksy kitzutzunki ne ison iwan Daft Punk, The Rapture, Justice, wan SebastiAn tik ne shiwit ume shikipil chikume (2007).

SebastiAn itanelualis senpa ipanpa "Testarossa Autodrive" ipanpa ne "EP" "1986", nemik tik ne ajawilti ulinkwikwil Grand Theft Auto IV wan Gran Turismo 5 Prologue. Kavinsky kutu iyawaltakwikalis "Nightcall" nemik tik ne weyak ulinkwikwil "Drive".

Tik ne metzti majtakti ume pal ne shiwit ume shikipil majtakti ume (12/2012) kiski "ProtoVision" wan tik ne tunal se pual makwil pal ne metzti ume tik ne shiwit ume shikipil majtakti yey (25/2/2013) kiski ne achtu iyawaltakwikalis "OutRun".

Tik ne tunal chikume pal ne metzti majtakti se tik ne shiwit ume shikipil majtakti nawi (7/11/2014) kiski ne kutu iyawaltakwikalis "Sovereign" tik SoundCloud wan Youtube.

Tik ne metzti majtakti se pal ne shiwit ume shikipil se pual se (11/2021), kiski ne achtu kutu iyawaltakwikalis "Renegade" ipanpa ne ume iyawaltakwikalis "Reborn". Kavinsky kichiwki ne itakwikalis iwan Gaspard Augé wan Victor Le Masne. Ne iyawaltakwikalis "Reborn" kiski tik ne tunal se pual makwil pal ne metzti yey tik ne shiwit ume shikipil se pual ume (5/3/2022).

Tik ne shiwit ume shikipil se pual nawi (2024), Kavinsky kitzutzunki ne itakwikalis "Nightcall" iwan Phoenix wan Angèle tik ne Ceremonia de clausura de los Juegos Olímpicos de París 2024.

Ne Icasoj Kavinsky

Vincent Belorgey kichiwki Kavinsky kenha ka yaja, melka ne icasoj tesu kenha. Icasoj pewa nemanha ka ne kichaluj ne itawikani Testarossa tik ne shiwit se shikipil chiknawi tzunti nawi pual chikwasen (1986) wan mikik, yaja muyulkwepki kenha se "zombie" tik ne shiwit ume shikipil chikwasen (2006), wan pejki kichiwa ison Electronica. Kavinsky itajtakwikalis kilwiat ne icasoj. Vincent kilwij: "'Nightcall' ipanpa ne 'zombie' takat ka yawi ka ikal iyuluchin wan kilwij 'naja tea kenha wan nikneki nimetztaketza'", taketza ipanpa Kavinsky ka yawi ka ikal iyuluchin nemanha ka yaja kichaluj ne itawikani, melka iyuluchin tea kenha.

Itekiw

Iyajyawaltakwikalis

• "OutRun" (ume shikipil majtakti yey / 2013)
• "Reborn" (ume shikipil se pual ume / 2022)

Kavinsky.

Iujulinkwikwil

• "Testarossa Autodrive" (ume shikipil chikwasen / 2006)
• "Dead Cruiser" (ume shikipil chiknawi / 2009)
• "ProtoVision" (ume shikipil majtakti ume / 2012)
• "Odd Look" (ume shikipil majtakti yey / 2013)
• "Renegade" (ume shikipil se pual se / 2021)
• "Cameo" (ume shikipil se pual ume / 2022)

Weyak ulinkwikwil

• "Pattt" tik "Nonfilm" (ume shikipil se / 2001)
• "Agent SNCF" tik "Aaltra" (ume shikipil yey / 2003)
• "Boon" / "Ricardo Bello-Radio Skotlett" tik "Atomik Circus, le retour de James Bataille" (ume shikipil nawi / 2004)
• "Verbrugghe" tik "Ultranova" (ume shikipil makwil / 2005)
• "Dan" tik "Steak" (ume shikipil chikume / 2007)

Ijilpika

https://es.wikipedia.org/wiki/Kavinsky

https://es.wikipedia.org/wiki/Danger_(músico)

https://es.wikipedia.org/wiki/Daft_Punk

https://es.wikipedia.org/wiki/Quentin_Dupieux

https://es.wikipedia.org/wiki/Ferrari_Testarossa

https://es.wikipedia.org/wiki/Ferrari

https://es.wikipedia.org/wiki/Extended_play

https://es.wikipedia.org/wiki/Lovefoxxx

https://es.wikipedia.org/wiki/The_Rapture

https://es.wikipedia.org/wiki/Justice_(banda)

https://es.wikipedia.org/wiki/SebastiAn_(músico_francés)

https://es.wikipedia.org/wiki/Grand_Theft_Auto_IV

https://es.wikipedia.org/wiki/Gran_Turismo_5_Prologue

https://es.wikipedia.org/wiki/Drive_(película_de_2011)

https://es.wikipedia.org/wiki/SoundCloud

https://es.wikipedia.org/wiki/YouTube

https://es.wikipedia.org/wiki/Phoenix_(banda)

https://es.wikipedia.org/wiki/Angèle

https://es.wikipedia.org/wiki/Ceremonia_de_clausura_de_los_Juegos_Olímpicos_de_París_2024

https://es.wikipedia.org/wiki/Música_electrónica