Expo 2008
| Expo Zaragoza 2008 | |
|---|---|
 | |
| Vista cheneral | |
| Clase-BIE | Especializada |
| Categoría | Exposición Internacional Reconoixida |
| Nombre | Expo 2008 |
| Tema | Augua y desarrollo sustenible |
| Aria | 25 ha. |
| Vesitants | 5.650.941 |
| Participant(s) | |
| Países | 104 |
| Organizacions | 21 |
| Puesto | |
| Seu | Meandre de Raniellas |
| Localidat | Zaragoza |
| País |  Aragón |
| Calendata | |
| Candidatura | chunio de 2003 |
| Asignación | 16 d'aviento de 2004 |
| Inauguración | 14 de chunio de 2008 |
| Clausura | 14 de setiembre de 2008 |
| Exposicions universals | |
| Anterior | Expo 2000 en Hannover |
| Siguient | Expo 2010 en Xangai |
| Exposicions especializatas | |
| Anterior | Expo 2005 en Nagoya |
| Siguient | Expo 2012 en Yeosu |
| Exposicions horticulturals | |
| Anterior | Royal Flora Ratchaphruek en Chiang Mai |
| Siguient | Floriade 2012 en Venlo |
A Expo Zaragoza 2008 estió una Exposición Internacional Reconoixida que se celebró en a ciudat de Zaragoza, a capital d'Aragón, dende lo 14 de chunio dica lo 14 de setiembre de 2008, y que tenió l'augua como principal eixe tematico. A localización d'o recinto d'a Exposición fació parti d'a mesma: a l'espuenda d'o meandre de Raniellas, vuelta que fa l'Ebro en pasar per a ciudat.
 Zaragoza |  Trieste |  Tesalonica | Abst. | |
|---|---|---|---|---|
| 1era Ronda | 47 | 35 | 12 | 3 |
| 2nda Ronda* | 57 | 37 | - | 1 |
| (*) A la 2nda ronda no i acudioron dos comisarios d'o BIE. | ||||
A Expo 2008 fue coordinada per o Bureau International des Expositions, organización responsable d'asignar as Exposicions. O 16 d'aviento de 2004, a candidatura de Zaragoza ta estar seu de l'Expo 2008 venció a las d'altras ciudaz candidatas, como Tesalonica (Grecia) y Trieste (Italia).
Zaragoza commemoró tamién en 2008 o bicentenario d'os Seches de Zaragoza d'a Guerra d'o Francés contra la invasión napoleonica (1808) y lo centenario d'a Exposición Hispano-Francesa de 1908, que suposó un primer blinco cualitativo en a modernidat d'a ciudat.
A mascota de l'Expo 2008 represientaba una chisla u gota d'augua clamada «Fluvi». O nombre, acronimo de flumen vitae ('arrigo d'a vida', en latín), se li dio dimpués d'un debate ciudadano prou controvertiu, y en o cual un d'os nombres favoritos yera estada la parola aragonesa 'Chisla'.
Tema principal
[editar | modificar o codigo]A tematica d'a Exposición tenió l'augua per obchecto central, baixo l'epigrafe d'«augua y desarrollo sustenible», y se'n desglosoron uns cuantos temas: «L'augua, recurso escaso»; «l'augua ta la vida»; «os paisaches de l'augua» y «l'augua como elemento de relación entre los pueblos».
Espacios emblematicos
[editar | modificar o codigo]D'entre los espacios emblematicos, se i troba:
- o Pabillón Puent, construcción que achunta o recinto de l'Expo con o barrio de l'Almozara, encomendada ta l'arquitecta britanico-iraquí Zaha Hadid;
- a Torre de l'Augua, grataciels de 76 metros d'altaria, disenyau per Enrique de Teresa, que permete de canalizar l'augua d'o recinto de l'Expo en creyar un circuito trancau en o cual se pueden fer actividaz variadas;
- o Palacio de Congresos de Zaragoza, de Nieto & Sobejano;
- l'Acuario fluvial, destinau a estar o mes gran d'Europa;
- o Pabillón d'Aragón, d'os arquitectos Olano y Mendo;
- o Pabillón d'Espanya, de l'arquitecto navarro Patxi Mangado, un edificio climaticament sustenible, a refricheración d'o cual se fa de trazas naturals per meyo de l'augua de plevia;
- a Palanga d'o Voluntariau de Manterola que, con una lonchitut de 277 m, achunta las dos espuendas sin emparar-se mica sobre lo río, con un mástel de 75 metros d'altaria;
- o Puent d'o Tercer Milenio, que enlaza la marguin dreita de l'Ebro con a Expo;
- o Pabillón Latinoamericano, que con l'epigrafe "Baixo la plevia, selvas y bosques latinoamericans" expresa la valura de l'augua d'as selvas latinoamericanas, integrando-ie elementos climaticos, edaficos, zoolochicos, botanicos y hidrolochicos en os suyos conceptos expositivos, sobre o río Ebro, a cargo de l'arquitecto mexicano Fernando López Guerra;
- as seis Plazas tematicas, que desenrrolloron un seguiu d'exposicions y espectaclos como estimulo ta la reflexión sobre l'augua;
- cualques telecabinas que achuntan a Estación Intermodal de Zaragoza-Delicias con o parque metropolitano y lo recinto de l'Expo.
Prochectos relacionaus
[editar | modificar o codigo]
A lo redol de l'Expo s'ha disenyau un gran parque metropolitano, a on os vesitadors pueden fer diferents actividaz, en contar entre altras cosas con:
- plachas fluvials;
- una canal d'auguas furas;
- una zona termal;
- un chardín botanico;
- un campo de golf;
- un pabellón de celebracions.
Amés, en relación con a celebración d'a Expo, uns altros prochectos estioron:
- a construcción d'un azut en l'Ebro que regla las auguas ta fer-ie un trampo navegable;
- a recuperación d'as espuendas de l'arrigo per meyo d'a enamplada d'as ceras, a esmarguinada d'o soto de ripera, a construcción de miradors u la instalación de pistas de voleibol y futbol placha, d'entre altras cosas;
- l'amilloramiento de La Uerba, d'o Galligo y d'a Canal Imperial d'Aragón;
- a incorporación d'os antigos depositos de Casablanca, como laco artificial con embarcacions;
- a remodelación y enamplada de l'aeropuerto de Garrapiniellos.
- l'amilloramiento d'a iluminación d'a ciudat, mesmo en molimentos y puents que en carreras y avenidas, amés d'a la basilica d'o Pilar y a la seu de Sant Salvador.
Países que i participoron
[editar | modificar o codigo]Amés de todas as Comunidaz Autonomas d'Espanya, a lista d'os 108 estaus d'o mundo que participoron en l'Expo 2008 estió a siguient:
.svg){kind=small}
.svg){kind=small}
Emplego posterior d'o recinto
[editar | modificar o codigo]Ye previsto que bels edificios de l'Expo sian logaus u enallenaus a diferents institucions. O Pabillón d'Aragón, per eixemplo, será la seu d'una consellería d'o Gubierno d'Aragón. Dos d'as construccions mes emblematicas, a Torre de l'Augua y o Pabillón Puent, podrían estar adquirius per conoixidas institucions financieras aragonesas.
Os pabillons internacionals s'adestinarán a oficinas a fin de creyar o parque empresarial mes gran de Zaragoza. En a suya remodelación s'ha embrecau lo estudio madrilenyo Lamela. O nuevo recinto contará igualment con establimientos ta l'ocio y la restauración.
Controversias
[editar | modificar o codigo]A construcción d'o recinto de l'Expo 2008 a lo meandre de Raniellas ye estada cuestionada dende diferents colectivos socials que han insistiu en a contradicción d'as obras y d'a ubicación de l'evento con o lema d'a propia exposición referiu a la sustenibilidat.
En ixe sentiu, os cheologos recomiendan no edificar sobre ramblars como lo meandre de Raniellas, ya que diz que corren periglo d'engaronar-se cada 20 anyadas. Ta solucionar o problema, se i ferán bels diques, encara que ixo podría resultar insuficient a largo termín.
Cientificos especialistas en limnolochía han criticau a construcción d'un azut abatible en l'Ebro, feito ta creyar una lama d'augua estable de 4 km, porque en altera lo rechimen hidraulico. Per istas obras, a biodiversidat fluvial s'ha visto prou alterada, ya que ha caliu retirar os moluscos bivalvos autoctonos en un trampo de 8 km.
As queixas d'a vecindat per o nivel de rudio que padeixen son cutianas.
Vinclos externos
[editar | modificar o codigo]
Se veigan as imáchens de Commons sobre Expo 2008.- (es)Sitio web oficial.
- (es)Blog oficial d'Expo Zaragoza 2008 - Primer blog en a historia d'as Exposicions Internacionals.
- (en) (fr) Sitio web d'o Bureau International des Expositions.
- (es) Video d'o espot promocional de l'Expo Zaragoza 2008.
- (es) Informe d'Ecolochistas en Acción de Zaragoza sobre o prochecto d'Expo 2008 a lo meandre de Raniellas ta o Bureau Internacional des Expositions.
- (es)Sitio web en contra d'a Expo.
